Bon Nadàe no basta ,

se no saemo vardare distante ,

no rivemo da nessuna parte ,

ve o dixe el grijo parlante .

Vardare deo olte no basta , 

 se pol vardare sensa vedare ,

 se pol vardare sensa sentire ,

ma i cori semplici , a xente bona ,

sa anca slongàre e man

e dare a chi no ga ,

dare speransa par el domàn.

Bon Nadàe , la dove anca on soriso ,

forse anca soeo na ocià,

xe de pi de on panetòn ,

o del tacuìn co on miliòn .

Bon Nadàe  a chi sa scoltare ,

a chi sa capire ,a chi sa parlare ,

e da vecioto ,senta col gato sui zanoci ,

davanti al camìn scopietante ,

ve saeuda el vostro Grijo Parlante.

   Me presento :      

                       mi "" Il GRILLO PARLANTE""

pai amissi : El grijo parlante

Ghio visto a novità , anca casa vostra , so capità ,

e par no farve stare sui spini ,

me presento all’istante ,mi so el grijo parlante .

Xe tempo che giro qua torno coe antene drissàe ,

i oci che vede tanto da rente che da distante ,

posso dire dire sensa faeàre , che a furia

de fare saltèi on poco in qua , on poco in là ,

romài conosso tutta a sità ,

diri’ che Vialconte no xe sità ,ma paese ,

ma par esigenze de rima ,

go meso par scrito a paròea

che me  xe vegnesta in mente par prima.

Mi nasso distante in tel tempo ,

no go na gran siensa , ma tanta esperienza ,

no go coeore , poitico …..se intende ,

ma me règoeo soa xente pai fati compìi,

no pae promesse , sempre e stesse ,

fate e rifate in campagna elettoràe ,

ma ciapà el voto , mai rtispettàe .

El grijo ve parla , coa vose dea cosiensa ,

ma anca el sa scoltare , co passiensa .

Qualcun se domandarà dove soi nato ,

qualche altro vurìa conosare el parchè

vegno drento in tee case e

in tee ciàcoe dea zente .

No tuto se pol savere , ma sapièi ,

omani , femane e putèi ,

che el grijo parlante , xe inframedo de valtri ,

el xe uno de valtri , uno che ve conosse

anca i pi veci ,che da cei portava e gaeòsse .

Mi no vui fare el sapientòn ,

serco de stare ùmie , in qualche cantòn ,

ma quando che vedo maegràssie

o vegno tirà paea giachèta ,

ve o digo suito ,ve o digo de core ,

no posso star zito , sarìa on erore .

El grijo se impersona soa xente ,

el xe uno fra tanti , el ve passa da rente ,

e sarà squasi sinquanta ani ,

da quando che mi ,grijo parlante ,

faxeo l’insegnante , qua in sta sità ,

ansi , no sità , ma paese ,voaltri dirì ,

ma se i ricordi xe boni ,

qualcun se ricordarà de Silvano Belloni ,

preside in teee scoe medie,

in chel’ometto pìcoeo e salteante ,

me so sconto par ani mi, grijo parlante .

Serto , lu ghea siensa e esperiensa ,

ma anca core e cosiensa ,

argussia , e ingegno ,

e so ogni roba ghe metèa impegno

tanto da far parlare anca on toco de legno……

tipo pinochio … esempio calsante

digo mi grijo parlante .

Tosati rabègoi , tosate sprotine ,

no ghea vita fassiè co Silvano …..

senò ghe tocava ripetere l’ano ,

ma seppure severo ,

saea usare e bone manière

tanto che el ga savùo

da tuti farse benvoère .

Desso ,come grijo , lu l’è ndà in pensiòn .

l’hà dassà sta tera par ndare in paradiso ,

a noaltri che lo ghemo conossùo ,

me resta na lagrima e on sorriso ,

e mi ultimo dei tosàti  sui , e no serto el pi brào ,

el me ga dassà el so canèo col penin schincà ,

me lo ga dassà in eredità ,

me ga dassà a so divisa da grijjo parlante ,

par scrivare e contare storie e novità ,

par sponciarve , in senso bon ,

par darve qualche consiglio ,

sensa arrogansa e sensa pretese

sensa obligo de sorta,sensa sorprese.

No so se sarò all’altessa ,no so se go e quaità ,

ma na eredità , la va sempre rispetà,

xe par questo che me so messo de impegno ,

e in verità me par de no ndare mae ,

parlo e digo , e ghin conto sempre tante ,

desso so mi …el grijo parlante .

17-05-2011